قصة جديدة
هاتي الحزام. دي لازم تضرب علشان تحترم نفسها.
وقفت كل العيلة تتفرج على جوزي وهو بيضربني بالحزام وبأيديه ورجليه لحد ما أغمى عليا، وسابوني مرمية مكاني على الأرض لحد ما ابني اللي عنده خمس سنين هو وأخته اللي عندها تلت سنين حطوا مية على وشي وفضلوا يهزوني ويعيطوا لحد ما فقت وطلعت شقتي.
نمت قد أيه مش عارفة، قمت على حد بيزقني جامد وبيزعق فوق دماغي؛ فببص لقيتها حماتي بتزعق وتقولي
هتقومي تعملي الأكل ولا اتصل بجوزك ييجي يتعامل هو معاكي؟ هو سافر مصر لشغله بس أنتي عارفة تليفون واحد هخليه يرجع وأنتي عارفة لو رجع هيعمل فيكي أيه.
بصيتلها ومقلتش أي حاجة غير
حاضر هقوم أعمل.
كنت واقفة في المطبخ بقول لنفسي وبعدين؟! هفضل في الذل ده لحد أمتى؟! هفضل شغالة خدامة ليهم كدا؟! وهفضل أتضرب وأتعامل زي الحيوانات كدا طول عمري؟! هفضل عايشة اسمي مرات راجل مش بشوفه غير كل تلت شهور مرة وبييجي يوم ويمشي واليوم اللي بييجي فيه يا إما يضربني يا يفكرني بأني مليش حد، لا أب ولا أم، ولا أي حد يسأل عليا ولا يقف قصاده ويجبلي حقي، ولو أتطلقت هيرميني في الشارع وياخد العيال.
كنت سرحانة ومش واخدة بالي من سلفتي العروسة الجديدة اللي اتضربت بسببها لأني منزلتش أحضرلها هي وجوزها الفطار، كانت سلفتي واقفة بصالي وبتضحك بتريقه عليا وبعدين قالتلي بسخرية
خليكي سرحانة كدا لحد ما تحرقي الرز خليها تيجي تجيبك من شعرك.
بصيتلها وما ردتش، أنا عارفة أنها بتحاول تستفزني علشان أرد وأطلع أنا الغلطانة في الآخر.
تاني يوم رحنا السوق أنا وشهد سلفتي العروسة ولقيتها بتقولي
بقلك أيه يا هيام أنا هشتري حاجة من هنا على ما تشتري أنتي باقي الخضار.
عدت ربع ساعة وشهد ما جتش، فضلت
ناديت عليها، وأول ما شافتني وشها أصفر واترعبت، والشاب اللي كان معاها مشي بسرعة وكأنه بيهرب.
فلقيتها أول ما قربت مني قالتلي بتوتر
دا دا. واحد قريبي بس مش من البلد وكان بيسألني على أهلي ويتطمن عليهم.
هزيت راسي وسكت، وأنا عارفة وهي عارفة أني فهمت أنها بتكذب عليا وعديتها.
من بعد الموقف ده لاحظت أن تصرفات شهد مش طبيعية، طول الوقت ماسكة الموبايل وبتتكلم مع حد وتبتسم وكل ما أقولها ساعديني في حاجة تقولي بكلم جوزي.
لحد ما في يوم كانت بتتكلم في الموبايل ولسه قايلالي أنها بتكلم جوزها، جت حماتي جايبة الموبايل بتاعها وقالتها
خدي يا بنتي كلمي جوزك علشان بيقولي بقاله كام يوم ما كلمكيش.
بصيتلها ومشيت ومردتش أقول حاجة.
وفي يوم نزلت على صوت حماتي وهي بتنادي عليا وقالتلي
روحي يا هيام شوفي شهد أخرت ليه عند الخياطة، قالتلي هروح أظبط شوية لبس من ساعتين ولحد دلوقتي ما جتش وتليفونها مقفول وجوزها اتصل وبيسأل عليها.
رحت عند الخياطة قالتلي أن شهد جت سابتلها شنطة فيها لبس ومشت ولسه ما جتش تاني.
بيت عمها قريب من الخياطة فرحت سألت عنها هناك ملقيتهاش وأنا راجعة لقيت شهد نازلة من عربية وببص لقيت الشاب اللي كانت واقفة معاه يوم ما رحنا السوق هو نفس الشاب اللي كانت راكبة معاه العربية.
أول ما قربت مني سألتها
كنتي فين يا شهد؟! ومين اللي كنتي راكبة معاه العربية ده؟!
اتعصبت كدا وزعقتلي وقالتلي
أنتي هتحاسبيني ولا أيه؟! أنتي مالك، روحي اتشطري على اللي مشغلينك خدامة عندهم ومش بتقدري تتنفسي
فقلتلها
خلاص يا شهد حقك عليا، أنا هقول لحماتي اللي شفته واتكلمي أنتي معاها.
فقالتلي بتهديد
أقسم بالله يا هيام ما تقولي حاجة لخليهم يرموكي في الشارع.
روحت ولما حماتي سألتني قلتلها
أهي عندك أهي أسأليها وهي تقولك كانت فين.
وسبتهم وطلعت وسامعة صوت زعاق تحت مفهمتش حصل أيه.
تاني يوم قمت على صوت خبط جامد على شقتي فجريت فتحت الباب لقيت حماتي زقتني وقالتلي
افتحي يا حرامية، خبيتي فين الدهب؟! وفين نسخة المفتاح بتاعي اللي عملاه لشقتك؟ سرقتيه علشان تخبي الدهب براحتك صح؟
مكنتش فايقة ولا مستوعبة هي بتقول أيه؛ فبصيت لشهد وسألتها
هو فيه أيه؟!
فقالتلي شهد بمكر
أنا مش قلتلك هخليهم يرموكي في الشارع، مبروك عليكي الطرد.
.بصيت لشهد وأنا مش مستوعبة هو أيه اللي بيحصل، حماتي قلبت الشقة بتدور على دهب أيه اللي سرقته أنا مش عارفة؟!
فسألت شهد
دهب أيه؟! ومفتاح أيه؟
فقالتي بمكر
أنا قلتلها أنك طلبتي مني أني أديكي خاتم دهب تبيعيه علشان تشتري لنفسك ولولادك لبس علشان العيد لأن جوزك مش بيديكي فلوس ولما أنا رفضت سرقتيه، وعلى فكرة الخاتم عندك في الشقة أنا خدت نسخة مفتاح شقتك اللي مع حماتي من غير ما هي تحس ودخلت حطيته وأنتي نايمة، يعني دقيقة بالكتير أو دقيقتين وحماتي هتلاقي الخاتم والباقي أنتي عارفاه.
فقلتلها بقهره
أنتي عايزة أيه مني؟! أنا ما اتكلمتش ولا قلت حاجة.
فردت عليا بهمس
عايزاكي تساعديني، ولو عملتي اللي هقولك عليه هديكي مبلغ يخليكي تعيشي بيه مبسوطة ومش هتحتاجي لحد هاه أتصرف أنا وأنقذ الموقف دلوقتي ولا مش ناوية تساعديني؟
هعمل أيه مش فاهمة؟!
هقولك
لقيت شهد مرة واحدة قالت بصوت عالي
لا إله إلا الله، أنا مش عارفة حصلي أيه؟! دماغي اتقلبت ليه كدا؟! معلش يا حماتي أنتي وهيام أنا نسيت أني لما كنت عند هيام دخلت الحمام وقلعت الخاتم وحطيته على الرف اللي في الحمام علشان خفت يقع مني ونسيته خالص، حقكم عليا، معلش أنا تهت خالص.
فبصتلها حماتي بعصبية وقالتلها
طب وفين هو الخاتم؟! أنا دخلت الحمام ملقتهوش، وكمان فين مفتاح الشقة؟
دخلت شهد هي وحماتي الحمام وخرجوا ومعاهم الخاتم و قعدت شهد تقول حقكم عليا والله أنا مش عارفة مالي اليومين دول ومش عارفة إزاي قدرت تقنع حماتي أن مفتاح الشقة هي مدورتش عليه كويس وأنها نسته في اللبس بتاعها اللي اتغسل ونزلوا هما الاتنين ولا قالولي أي حاجة.
بصيت لولادي لقيتهم هما الاتنين خايفين وماسكين في رجلي حتى بعد ما مشوا وقفلت الباب.
حضنتهم وسكت، سكت كالعادة، سكت زي ما سكت لست سنين من وقت ما اتجوزت، سكت بس كنت حاسه بأن البير اللي جوايا اللي عمالة ارمي فيه كل حاجة خلاص قرب يتملي ويفيض ووقتها بجد هبقى حد تاني خالص، حد كان طيب بس من كتر ما استغلوا طيبته حولوه لحد تاني، حد سكت وعدى حاجات مكانتش المفروض تتعدى وأنا عديتها.
فضلت قاعدة مكاني ومقدرتش أنام، ببص لولادي وهما نايمين ومتطمنين بوجودي وأنا حاسه بوحدة فظيعة وكسره جوايا وذل.
معرفش نمت أمتى وإزاي قمت على صوت تليفوني بيرن، لقيته رقم غريب فمردتش أرد، لقيته بعت رسالة فيها كلام غريب أنه بيحبني وعارفني وعارف أن جوزي بيضربني وبيسبني بالشهور ويسافر؛ فعملت للرقم حظر ونزلت تحت أحضرلهم الفطار.
حماتي طلبت مني أروح اشتري طلبات للبيت وخضار؛ فرحت ووأنا في الطريق وقف
خليني أشيل معاكي،
